Fel gweinyddwr, gallwch ddefnyddio’r Golygydd Thema (Theme Editor) greu themâu personol ar gyfer eich sefydliad. Mae themâu yn cael eu creu o dempledi Canvas sy’n bodoli’n barod. Mae unrhyw thema sydd ar waith yn y cyfrif hefyd ar waith yn yr holl isgyfrifon, er bod modd defnyddio’r Golygydd Thema (Theme Editor) i greu themâu ar gyfer isgyfrifon unigol. Ar ôl i chi greu a chadw thema, gallwch roi’r thema ar waith ar gyfer eich cyfrif ar unrhyw adeg Gallwch hefyd greu themâu newydd yn seiliedig ar themâu blaenorol. Dysgu sut i reoli themâu wedi’u cadw.
Gweld fideo am y Golygydd Thema.
Etifeddu Thema (Theme Inheritance)
Mae brand personol yn cael ei gynnal ar lefel y cyfrif, ac yn ddiofyn, mae isgyfrifon a’u cyrsiau cysylltiedig yn etifeddu brand cwrs. Ond, gallwch alluogi isgyfrifon i ddefnyddio’r Golygydd Thema; bydd unrhyw elfennau sydd ddim yn cael eu newid yn benodol yn dal yn cael eu hetifeddu ar lefel y cyfrif.
Mae ymrestriadau defnyddwyr yn gysylltiedig ar lefel y cyfrif, ac mae ymrestriadau cwrs yn gysylltiedig ar lefel yr isgyfrif. Mae ymrestriad yn cael ei greu pan fydd defnyddiwr a chwrs yn cael eu cyfuno. Os nad yw defnyddiwr wedi ymrestru ar unrhyw gwrs, yna bydd y Dangosfwrdd yn dangos brand y cyfrif. Mae’r algorithm hwn hefyd yn ymwneud â thudalennau sydd ddim yn gysylltiedig â chwrs gan gynnwys cyfrif a gosodiadau defnyddiwr, Calendr, a Sgyrsiau. Mae data defnyddwyr wastad yn cael ei ddal ar lefel y cyfrif, a dyna pam nad oes modd iddyn nhw etifeddu brand isgyfrifon.
Os yw defnyddiwr wedi ymrestru ar gwrs yn y cyfrif, yna mae’r Dangosfwrdd yn dangos brand y cyfrif. Os yw defnyddiwr wedi ymrestru ar gwrs o fewn isgyfrif, yna mae’r Dangosfwrdd yn dangos brand isgyfrif. Os yw defnyddiwr wedi ymrestru ar gwrs o fewn mwy nag un isgyfrif, neu os yw un o'r cyrsiau yn y cyfrif, yna mae’r Dangosfwrdd yn dangos brand y cyfrif.
Cydrannau’r Golygydd Thema (Theme Editor Components)
Am fanylion am gydrannau’r Golygydd Thema, gan gynnwys cydrannau sydd i'w gweld ar apiau Canvas, edrychwch ar y ddogfen adnoddau Cydrannau Golygydd Thema Canvas. I gael help gyda thempledi delweddau, edrychwch ar y ddogfen adnoddau Templedi Delweddau Golygydd Thema Canvas. Dydy logos, delweddau, a marciau dŵr ddim i’w gweld gan ddefnyddwyr sy’n galluogi’r opsiwn nodwedd Arddulliau Cyferbynnedd Uchel (High Contrast Styles) yng ngosodiadau’r defnyddiwr.
Ffeil CSS/JS (CSS/JS Files)
Does dim angen ffeiliau dalenni arddull rhaeadru (CSS) neu JavaScript (JS) personol, ond mae’r Golygydd Thema yn gallu delio â ffeiliau disodli hefyd. Rhaid i swyddogaeth ffeil CSS/JS fod wedi’i galluogi gan eich Rheolwr Llwyddiant Cwsmeriaid. Cyn llwytho ffeiliau CCS neu JS personol i fyny, byddwch yn ymwybodol o’r peryglon cysylltiedig, gan y gall ffeiliau personol achosi anawsterau hygyrchedd neu wrthdaro â diweddariadau Canvas yn y dyfodol. Gallwch ddysgu mwy am gyfyngiadau ar CSS/JS personol.
Nodiadau:
- Nid yw’r Golygydd Thema ar gael mewn cyfrifon Am-Ddim-i-Athrawon.
- Os ydych chi’n weinyddwr isgyfrif ac nad yw’r ddolen Themâu yn ymddangos yn y ddewislen Crwydro’r Cyfrif, nid yw’r nodwedd Themâu wedi’i galluogi ar gyfer isgyfrifon. Os nad yw’r tab Llwytho CSS/JS i Fyny yn ymddangos, nid yw'r nodwedd llwytho ffeiliau i fyny wedi’i galluogi ar gyfer isgyfrifon.
- I weld rhagolwg o frandio’r Golygydd Themâu, bydd angen i chi ddiffodd y Rhyngwyneb Defnyddiwr Cyferbyniad Uchel.
- Yn ddiofyn, mae cyfrifon plentyn consortiwm yn etifeddu’r thema sydd wedi’i gosod yn y cyfrif rhiant. Ond, mae cyfrif plentyn consortiwm yn gallu creu thema newydd ar gyfer cyfrif plentyn.
Agor Cyfrif
Yn y ddewislen Crwydro'r Safle Cyfan, cliciwch y ddolen Gweinyddwr (Admin) [1], yna cliciwch enw’r cyfrif [2].
Agor Themâu
Yn y ddewislen Crwydro’r Cyfrif, cliciwch y ddolen Themâu (Themes).
Nodyn: Os yw themâu isgyfrifon wedi cael eu galluogi, mae pob isgyfrif hefyd yn cynnwys dolen Themâu (Themes). I agor y Golygydd Thema ar gyfer isgyfrif, cliciwch y ddolen Isgyfrifon (Sub-Accounts) i ganfod yr isgyfrif a’i agor, yna cliciwch ddolen Themâu (Themes) yr isgyfrif.
Agor Templed Thema
Os nad oes gennych chi thema Canvas ar gyfer eich cyfrif, defnyddiwch dempled i greu thema newydd. Gallwch ddewis templed Diofyn Canvas, templed syml a thempled Cyflwr U. Os yw eich Rheolwr Llwyddiant Cwsmeriaid wedi galluogi’r opsiwn nodwedd sy'n benodol i K12, bydd y Thema K12 hefyd yn ymddangos fel templed.
I greu thema newydd, dylech hofran uwchben templed a chlicio’r botwm Agor yn y Golygydd Thema (Open in Theme Editor) [1], neu cliciwch y botwm Ychwanegu Thema (Add Theme) [2] a dewis templed o’r rhestr.
Agor Thema wedi’i Chadw
Os ydych chi eisoes wedi creu a chadw thema, gallwch olygu themâu sydd wedi’u cadw unrhyw bryd. Mae themâu sydd wedi’u cadw yn ymddangos yn yr adran Fy Themâu (My Themes). I agor thema sydd wedi'i chadw, dylech hofran dros enw’r thema a chlicio’r botwm Agor yn y Golygydd Thema (Open in Theme Editor) [1].
I greu thema newydd yn seiliedig ar thema sydd wedi’i chadw, cliciwch y botwm Ychwanegu Thema [2] a dewis enw'r thema sydd wedi’i gadw ar y rhestr [3]. Mae’r opsiwn hwn yn eich helpu i osgoi diystyru'r thema rydych chi eisoes wedi’i chadw.
Gweld y Golygydd Thema
Mae’r Golygydd Thema (Theme Editor) yn dangos tudalen sampl er mwyn i chi gael rhagolwg o’ch brand personol. Bydd y cydrannau hyn yn newid yn unol â’r lliwiau a’r brand rydych chi’n eu hychwanegu gan ddefnyddio'r Golygydd Thema (Theme Editor).
Gweld Tab Llwytho CSS/JS i fyny
Os oes ffeiliau disodli dalenni arddull rhaeadru (CSS) neu JavaScript (JS) personol wedi cael eu galluogi ar gyfer eich cyfrif, yna bydd bar ochr y Golygydd Thema (Theme Editor) yn dangos tab Golygu (Edit) [1] a thab Llwytho i fyny (Upload) [2]. Yn ddiofyn, mae’r Golygydd Thema yn mynd i’r tab Golygu (Edit) ac yn dangos holl gydrannau’r Golygydd Thema. Mae’r tab Llwytho i fyny (Upload) yn gadael i chi lwytho ffeiliau personol i fyny.
Dod o hyd i Gydrannau
Mae gan y Golygydd Thema bedwar grŵp o gydrannau: Brand Cyffredinol, Crwydro'r Safle Cyfan, Marciau Dŵr, Delweddau Eraill, a Sgrin Mewngofnodi. Yn ddiofyn, mae bar ochr y Golygydd Thema yn dangos y grŵp Brand Cyffredinol (Global Branding).
Chwiliwch am y gydran rydych chi am ei haddasu. Gallwch ehangu a chrebachu grwpiau drwy glicio’r eicon saeth drws nesaf i bennawd y grŵp.
Dewis Lliw gan ddefnyddio CSS
Mae gwerth diofyn pob cydran wedi’i bylu yn y maes testun.
I nodi cydran lliw, dewch o hyd i faes testun y gydran a rhowch liw CSS newydd. Gallwch roi lliwiau gan ddefnyddio cod HEX, gwerth RGB, neu enw lliw dilys.
Nodyn: Bydd lliwiau sy’n cael eu rhoi yn newid ac yn ymddangos fel codau hex.
Dewis Lliwiau gan ddefnyddio’r Dewisydd Lliwiau
Mewn porwyr sy’n gallu delio â lliwiau cynhenid, mae modd defnyddio’r dewisydd lliwiau i ddewis gwerth. Chwiliwch am y gydran a chlicio’r blwch lliw. Bydd y dewisydd lliw yn ymddangos mewn ffenestr newydd.
Dewis Lliw
Dewiswch liw yn y ffenestr dewis lliw [1]. Ar ôl i liw gael ei ddewis, bydd y gydran yn dangos y lliw newydd yn y blwch [2]. Hefyd, bydd lliw hex y gydran yn diweddaru gyda’r gwerth lliw newydd.
Ychwanegu Delweddau
Ar gyfer cydrannau sydd angen delweddau, dewch o hyd i’r gydran a chliciwch y ddolen Dewis Delwedd (Select Image). Bydd y disgrifiad o’r ddelwedd yn cynnwys mathau o ffeiliau cydnaws.
Gweld Rhagolwg o’r Thema
I weld rhagolwg o’ch thema, cliciwch y botwm Gweld Rhagolwg o’ch Newidiadau (Preview Your Changes).
Bydd Canvas yn creu rhagolwg o’r cydrannau ar sail eich newidiadau i’r templed. Os oes angen, gallwch wneud newidiadau ychwanegol a gweld rhagolwg o'ch thema eto.
Cadw Thema
Pan fyddwch chi’n fodlon ar y newidiadau i’ch templed, cadwch eich thema drwy glicio’r botwm Cadw Thema (Save Theme).
Creu Enw i’r Thema
Os ydych chi wedi addasu thema o dempled, mae’r Golygydd Thema yn creu copi o’r thema. Does dim modd golygu templedi yn uniongyrchol. Yn y maes Enw Thema (Theme Name) [1], rhowch enw ar gyfer eich thema. Cliciwch y botwm Cadw Thema (Save Theme) [2].
Nodyn: Os ydych chi wedi golygu thema sydd wedi’i chadw eisoes, bydd cadw’r thema yn diystyru’r fersiwn blaenorol ac yn defnyddio’r un enw ar gyfer y thema.
Rhoi Thema ar Waith
I roi eich thema ar waith yn eich cyfrif, cliciwch y botwm Rhoi Thema ar Waith (Apply theme) [1].
I adael y thema a dychwelyd i'r dudalen Themâu, cliciwch y botwm Gadael (Exit) [2]. Gallwch agor y thema a’i rhoi ar waith yn eich cyfrif unrhyw dro.
I roi thema ar waith yn eich cyfrif cyfan, cliciwch y botwm Iawn (OK) [1]. I ddychwelyd i'r Golygydd Thema (Theme Editor), cliciwch y botwm Canslo (Cancel) [2].
Nodyn: Os yw eich cyfrif yn caniatáu i isgyfrifon addasu eu themâu eu hunain, yna bydd unrhyw newidiadau perthnasol rydych chi wedi’u gwneud hefyd yn hidlo i lawr i unrhyw isgyfrifon cysylltiedig. Mae Canvas yn dangos statws eich diweddariadau yn y Golygydd Thema; ar ôl i’r broses gael ei chwblhau ar gyfer pob isgyfrif, bydd yr isgyfrif yn diflannu o’r ffenestr cynnydd. Ar ôl i'r holl isgyfrifon gael eu diweddaru, bydd y Golygydd Thema yn eich ailgyfeirio yn ôl i’r dudalen Themâu (Themes).
